Curriculum
VitaeCurriculum
Vitae(in ’t Vallekebergs plat)
In ‘t naojaor van 1950, um precies te zin op 18 september, houwe inkele 'Boete de Poortse' jóngluuj in Vallekeberg de mood um ‘n mannekoar op te riechte binne de riek gezegende zengers-gemeinsjap van ‘t bleujende Zuid-Limburgse toeristesjtedsje.
‘T waor neet zónder beteikenis dat zie es naam veur ‘t koar 'Geulklank' bedachte: de sjtumme van ‘t Vallekebergse hart zoewe klinke wie ‘t zuvere en heldere gekabbel van 't reveerke, dat ‘t Zuid-Limburgse land doorploog. Dat daorum de Geul en häör ooversj door ‘t koar väölvuldig woorte en were bezónge, maog neet verwónderlik zin.
De
toen 18-jäörige Vallekeberger Wiel Odekerken, naozaot oet ‘n roemriek
meziekgesjlach, naom bie de opriechting de dirigeersjtek ter hand op 'n wies die veur ‘nnen amateur-pur-sang oetzönderlek
maog were geneump. In de loup der jaore wies heer mèt
'zien' Geulklank op basis van ein veur ‘t koar kènmerkende hechte en pure
vrundsjapsband ‘n repertoire op te boewe, dat inmiddels varieert van ein sjat
aan romantiese leedsjes bies ein groat aantal moderne Nederlandstalige werke.
Veurnamelek
mèt dit lètste genre koes me in 1973 doordringe bies d’n top van de
Nederlandse mannekoarzangk door ‘t hoagste aantal punte te beholen in de
hoagste aafdeiling veur mannekoare tiedens ‘t Nederlands Koarfestival,
georganizeerd door de AVRO en door de Keuninkleke Bónd van Zangk- en
Oratoriumvereiniginge. Veur de
Bónd, woavan Geulklank destieds lid waor, ein rae te miè um ‘t koar in 1975, es
representant van de landeleke mannekoarzangk, oet te nuèdige veur de
Nederlandse Koardaag te Hengelo. Dao woord mèt verve de premjaere oetgeveurd van ‘n spesjaal veur mannekoare door Geza Frid, in opdrach van de Bónd,
gesjreve compositie 'Houdt den Tijd', ein virtuoos werrek mèt begeleiding van
15 sjlaaginstrumente. Veur de AVRO waor dit aanleiding um ‘t koar oet te nuèdige
veur diverse radio-concerte.
In 1985 traoj Geulklank toe tot 't gewes Limburg van 'r Keuninklek Nederlands Zengersjverbónd.
‘T koar, dat van ein twintigtal tiedens de opriechting ies oetgegreujd bies ‘n sonoor gezelsjap van zoa'n 60 lede, haet natuurlek ouch de bekènde opera-koarwerke op häör repertoire sjtoon, meh wèt ziech bie de Vallekebergse gemeinsjap en bie de Vallekebergersj in de vraemde veurnamelek in ‘t hart gesjlote door de vertólking van ein sjat aan dialek-leedsjes, woavan d’r väöl zint getoanzat door ière-dirigent Wiel Odekerken.
Zien enerzjieke wilskrach, die hae ummer op de zengersj wies euver te bringe, ies waarsjienlek debet d'raan dat Geulklank zjuus dat bietsje Ooseuropese affiniteit haet um diech bie de oetveuring van ein Sjlavies leefdesleed of ein unsjtuimig Kozakkeleed thoes te wane bie 't volk van Balkan bies Oeral.
In 1998 woord de legendariese Wiel Odekerken, nao 48 jaor, opgevolleg door Peter Hensgens oet Kèrkrao. Dae gaof nao twiè jaor d'n dirigeersjtek door aan de jeugdige Arno Kerkhof, dae metein veur de zjwoar taak sjting um Geulklank naor de viering van 't vieftigjäörig besjtoon te leije in september 2000. Hae sjlaagde dao mèt verve in en dat jublileum greujde dan ouch oet, zoawaal veur 't koar es wie veur de Vallekebergse gemeinsjap tot ein groats driedaags festijn.
Drie
kièr haet Geulklank noe zien kènne op ‘nne geluidsdrager vasgelag. In 1980,
bie gelegenheid van ‘t 30-jäörig jubileum, op ein LP woabie op de ein ziej
‘t Vallekebergse dialek-repertoire en op de ander ziej melodieje van
Balkan bies Oeral zint vasgelag.
In 1995 brach Geulklank ónder de klinkende naam 'Meanderende Melodieën' ein CD oet, woamèt ‘t ein muzikaal róndreis door de waereld maak.
En in 2006 kaom Geulklank mèt de CD "Kleur in Zank". Opnuujts e prachtig en hièl gevarieerd meistersjtuk, woamèt dirizjent Arno Kerkhof de sonore klank van Geulklank weer lièt klinke, zoa wie oze aanhang dat zoagaer huèrt. Loestert zelf mer op de pagina 'meziek huère'.
Op ‘t 15e Internasjonaal Zangconcours te Heijthuijsen behoolde Geulklank in 1991 mèt 360 punte eine 1e pries mèt lof van de zjurie en kaom daomèt neet allein es bèste Nederlandse koar oet de bus, meh eindigde ouch internasjonaal gezeen op ‘nne oetsjtekende twiède plaatsj, vlak achter ‘t semi-professjonele Universitäts-Chor Osnabrück.
Geulklank
wèt ziech in ‘t Vallekebergse verzekerd van ein hechte plaatsj in ‘t
gemeinsjaps- en vereinigingsleve. 't Aktief deilnömme aan en organisere van
andere culturele en gemeinsjaps-activiteite ies dao ongetwiefeld mede debet aan.
't Vermelle weerd ies zeker nog dat ‘t koar de bekènde Iwan Rebroff begeleidde en optraoj mèt André Rieu en mèt de vermaarde Vallekebergse sopraan Marjon Lambriks.
Hoagtepunte veur de zengersj van Geulklank zint tensjlotte nog de meziek-reiskes, die ins in de paar jaor mèt väöl gezelligheid en zengersj-verbroedering were gehoute naor ‘t umringende boeteland.
